.

.

كل ما جيت في وصف حبيبي ترددت

كل ما وصفته .. ارجع اقول لا ما وصفت

و كيف ما اتراجع في كلامي و انا بجماله افتتنت

حبيبي كله رقه و دلع .. حبيبي له نظرهٍ بيها الجمال ابتدأ

سحرتني خضر عيونوا و كلامه اللي على قلبي احلى من العسل

في جماله قالت عيوني ما شفت بها الجمال احد

وصدق من قال ثلاثة يذهبن العقل : الخضره و المال و الوجهه الحسن

وحبيبي جمع بين جمال الطبيعه و جمال البشر

.

قبل كم يوم ارسلي اخويا ” فهد ” رسالة على الايميل عن عبقري رياضيات

يسوي عمليات ضرب بشكل جدا سريع و نواتجوا صحيحه ١٠٠ ٪ ..

.

بس قبل ما اوريكم المقطع عندي لكم قصه صغيره تعكس مدى عبقريتي الشخصيه في هذا العلم

بما اني لحقت النظام القديم اللي في المدارس واللي كانت فيه الاختبارات من ٨ درجات

و اذكر انوا كانت سنه اولى بس هيا اللي فيها تقويم مستمر << اذا ما خانتني الذاكره طبعا >>

.

على العموم هذي المقدمه تكفي لرواية القصه

في ليلة زي هذي الليالي اللي يختبروا فيها طلاب المدارس << الله يكون بعونهم

كان عندي اختبار رياضيات << وكنت في الابتدائي يا سنه ثانيه او ثالثه >>

قعدت معايا امي ” الله يرحمها “  تعلمني الجمع

و مسائل في الجمع و الطرح .. ليين ما خلاص حست هيا اني متمكن من الجمع و الطرح واني استعديت بشكل ممتاز للإختبار

.

لكن هذا الشئ تغير على ورقة الاختبار ..

لاني جبت ٦ من ٨ .. طبعا مداكم تقولوا انها نتيجه كويسه

لكن السؤالين اللي غلط فيهم كانت تافهه

اللي اذكروا سؤال واحد منهم اللي هوا :

٦ + ٦ =

طبعا انا مجاوب عليه و بكل ثقه و محدد على اجابتي كمان

٦ + ٦ = ١١

غلطتي كانت اني كنت اعد من الرقم اللي قبلوا عشان اجمع عليه اللي بعدوا يعني كنت اعد زي كذا :

٦ ٧ ٨ ٩ ١٠ ١١

طبعا هذي الغلطه دفعت ثمنها غاليا .. لاني ذاك اليوم اكلت ضربة محترمه

و من ذاك اليوم صرت كل ما يسألني احد  : كم ناتج هذا الشئ ..

اذا ما كان معايا اله حاسبه .. اقولوا ما اعرف .. او اقولوا ترى الناتج حيكون قريب من كذا

لكن حرمت اعطي نواتج و اسوي واثق ..

.

وكويس جدا انهم سامحين استخدام الالة الحاسبه في الجامعات ولا كان بانت الفضايح مزبوط

.

نرجع للعبقري (( ساحر الرضيات )) و مشاهده ممتعه

” لغتوا الانجليزيه مهي صعبه ”

(( الرسمه عجبتني .. ))

.

كنت مع صاحبي في الجامعة اللي اشوفوا اكثر من اهلي في البيت ..

و قلي تدري انوا الكمبيوتر يأخذ كل يومنا .. حتى لو ما عندنا شئ ممكن نضيع ٣ او ٤ ساعات

قلي لو في يوم جربت ما اشتغلت على الكمبيوتر نهائيا راح تلاحظ انوا يومك صار فاضي و عندك وقت تخرج فيه و تقعد تقرأ شئ

و بما اننا دايما نتعابط على اي شئ  .. قتلوا بس يا شيييخ !.. مو لهذي الدرجه

و ما عدا على حوارنا هذا يوم .. وحدث غير المتوقع ..

لفظ هاردسك جهازي انفاسه الاخيره .. وكنت افكر بتكسير الجهاز جديا بعد ما راحت الملفات و الصور و كل الاشياء اللي كانت فيه

طبعا هذي كلها ما فرقت عندي بصراحه ..

لكن في صور لناس مهمين و غالين بالنسبه لي و لقطات فيديو لهم  .. كنت اتمنى انها تبقى ذكرى حلوه

طبعا كلها راحت .. و من ذاك اليوم صرت غير مهتم بأي شئ

و قعدت بدون كمبيوتر ما يقارب اسبوع .. و اكتشفت انوا كلام صاحبي صح والله ..

العيشه بدون كمبيوتر صعبه عليا .. خاصه اني من النوع اللي متعود اني اشيك على الايميل كل شويه و تويتر و الفيس بوك و اتفرج لقطات على اليوتيوب ، حتى مذاكرتي على الكمبيوتر ( سلايدات ، كتب ، اكواد )

و من هنا جاء دور الاخ نواف .. جزاه الله كويس على الدعم النفسي و المادي اللي قدموا

و مع خراب كمبيوتري كنت مشغول جدا في الاختبارات ..

و جدول اختباراتي في الاسبوعين اللي فاتت

من السبت الى الربوع في الاسبوع الاول

و الاسبوع الثاني : سبت و احد و ربوع

هذي كانت اسباب انقطاعي عن عالم التدوين .. و عموما النت كلوا ما كنت ادخله بكثره ..

…

..

.

لمحه سريعه : اكثر ما غير عليا جوا في هذي الفتره الاسئله الغريبه اللي تجيني من خلال موقع الاسئله ..

ولا الاسئله اللي ادخل اشوفها في حسابات اصحابي .. اسئله ما ادري ايش تبغى ..!!

.

فتوكوا ع خير < والله يعين على مباراة مصر و الجزائر اليوم ..

عامكم مبارك ..
والله يحقق لكم فيه كل اللي تتمنوه يا رب
:‫)
.

و بما اني طالب وفي هذه الفتره امر بأختبارات نصفيه
لكن دايما انا اقولهم المشكلة مش في الاختبارات ..  المشكله في اللي راح يختبرك هذا الاختبار ..
لانوا في دكاتره ما يعرفوا يحطوا اسئله..

.
حديكم مثال :
على دكتور مفلسع اخذ هذا الترم معاه مادة علوم القرآن
الدكتور مكاوي زاحف و محاضرتوا ممتعه خاصة لما يشطح و يتكلم في اشياء بعيده عن المنهج
في يوم تعيس جانا الدكتور و قال ترى اختباركم المحاضره الجايه …
و حدد لنا ما يقارب ٩٠ صفحه بس في الدوري الاول ..

.
المهم ذاكرت للأختبار و كل شئ كان تمام التمام ..
جا يوم الاختبار و وزع الدكتور الاوراق .. والاسئله بصراحه ما كانت سهله
واللي صدمني انوا في اسئله يقولي فيها اختار من التالي :
**   ذكر المؤلف المقوله الفلانيه في النقطه رقم (١ ،٢ ،٣ ،٤ )   **

.
طبعا الكتاب مليان نقاط ذكرها المؤلف .. المؤلف في كل موضوع حاط نقاط
وانا كطالب عادي ذاكرت النقاط و حفظتها لكن ما حفظت ارقامها ..

.
المهم حليت بطريقة (حقره بقره قلي عمي عد لعشره.. الخ )
،

طبعا ايش الدرس المستفاد من هذا الاختبار .. انوا في اختبارات لازم تبرشم النقاط اللي في الكتاب مع ارقامها عشان تحل و تجيب درجه كويسه ..

على العموم الله يعدي هذي الفتره على خييير .. و بالتوفيق للجميع

.

في الفتره الاخيره انتشر بين مستخدمي تويتر موقع جدا خطير و بسييط
.
فكره الموقع :
انك تدخل في الموقع على صفحة اي مستخدم و تسأله عن أي شئ يدور في بالك و نفسك تعرفه عنه ..
او انك تدخل الموقع و تسوي لك صفحه و تنشرها و تجاوب على الناس اللي تدخل صفحتك و تسألك
.
انطباعي عن الموقع :
انا اشوف انوا الموقع للتسليه …
و لتغير الجو .. يعني تدخل الموقع تلاقي واحد زي الاخ الطربش نواف .. قاعد يسأل فيك اسئله دايخه

.

شخصيا ارحب بأي سؤال .. و اجواب على اي سؤال حتى لو كان السؤال زي اسئلة نواف 

عموما اي واحد عندوا حساب في الموقع و حابب اني اضيفه لموضوعي يديني خبر ..
اضغط هنا .. للدخول للموقع .. للي حابب يسجل فيه
انقر للدخول على الحسابات في الموقع :
صفحتي  ^.^
صفحة نواف ..
صفحة بيان ..
صفحة سراج علاف ..
صفحة عبرات اثنى ..

.

بما اني واحد من الشعب العزيز تخرجت من الثانوية و انا مني عارف ايش راح ادرس في الجامعه
وايش هو التخصص المناسب ليا ؟؟!!
كانت هذي كلها اسئله تنقز في راسي دايما !!
،
‫.‬
مو بس كذا .. كانت عندي فكره جدا خاطئه عن بعض التخصصات و الدراسات ..
يعني كنت احسب انوا الانسان اللي يدخل إدارة و اقتصاد لما يتخرج راح يصير من الناس يدوروا على البيوت و يبيعوا اشياء ..
و كانت احسب المهندس هو اللي يوقف في الشمس و يبني العماير و الفلل ..
و طبعا اللي يتخرج و معاه شهادة حاسب هذا نهايتوا مدرس طفشان ..
.
.
و اكتشفت اني كنت غلطان طبعا ..

.

طيب بأتكلم عن قسمي اللي هو الحاسب ” لانوا كثير من اللي اعرفهم اخذين عن هذا القسم فكره غلط ”
اول شئ ترى خريج كلية الحاسب مهو زي الهندي و الباكستاني اللي يشتغلوا في محلات الكمبيوتر و يعملوا فورمات و صيانه للأجهزه .. لانوا هذي الاشياء اصلا ما يبغالها دراسه ..
في كلية الحاسب ندرس الصيانه و لغة برمجه و شبكات و قواعد بيانات ..
و مو بس اشياء تقنية .. في تخصصات يدرسوا فيها الادارة الالكترونيه و آمن المعلومات و تحليل النظم البرمجيه ..
طبعا في خيارات كثيره للطالب اللي يتخرج من هذي الكلية .. يعني مداه يصير ” مطور برامج .. مدير شبكات .. مدرس .. محلل نظم .. و غيرها ))
.‫.‬
هذا كان موجز بسيط عن كلية الحاسب ..
لكن ياريت كل واحد يكتب عن المجال او التخصص اللي هو فيه … نبذه عنوا و عن الاشياء اللي يحتويها التخصص .. ؟؟!!

.

.

اما كان بالإمكان افضل مما كان !! ؟؟
سؤال سألته نفسي و انا اقرأ و اشاهد ما حصل في جده من مآسي ..
عائلات غرقت بأكملها و اخرى تبحث عن مفقوديها الى الان
الوفيات وصلت الى المئه و التلفيات في ممتلكات الشعب وصلت للمئات و ربما الآلاف ..
‫.‬
وقفه بسيطه مع الذكريات في جده ..
اتذكر اني كل ما كنت في جده و نزلت فيها امطار .. كنت اشم رائحه عفن “الله يكرمكم ”
وكنت اسأل نفسي ايش الريحه المعفنه هذي ؟؟!! ..
لكن بعد هذي الايام اللي فاتت عرفت انوا هذي الرائحه العفنه هي نتيجه لفساد إداري تراكمت عليه العصور و كميه هائله من الخزي الناجم عن أكل اموال المسلمين لتوسيع حسابات بنكيه بائسه ..
‫.‬
ليست الاضرار فقط في العشوائيات بل حتى في المشاريع الجديده ..
و هذا يعني ان الإحساس بالامانه قد ضاع و في بعض فئات شعبنا العزيز ..
‫.‬
‫.‬
شكر كبير للملك عبدالله على ما جاء في القرار الملكي بخصوص جده و محاسبة المسئولين ..
و اخيرا قال الله تعالى (( وقفوهم انهم مسؤولون ))
والله انهم لمسؤولون امام الله على فسادهم ..
‫.‬
‫.‬
اللهم ارحم موتى المسلمين ..
اللهم اجبر ذويهم يا الله ..

.

كل عام وانتوا بخييير ..
عيدكم سعيد إن شاء الله
الله يعيده علينا و عليكم بكل خيير يارب

.

.

.

عاد ما اوصيكم على صاحبنا اللي في الصوره .. 

.

مع انها الشركة الاقدم .. والمفروض انها تكون الافضل
لكنهم اثبتوا انوا التميز ليس بالمده .. فالشركة هذي اعتبرها من اسوء الشركات في الدنيا كلها
عندها اعلانات مدويه و قويه تخليك تحس انوا عندها سالفه .. لكن الحقيقه عكس ما يقال
ببساطه جملة واحده تشرح هذي الشركه
(( حياة اسهل بدون استخدام الجوال  ))   
.
.
وإن استخدمت شبكتهم فكن على استعداد لمقاومة الضغط و حرق الاعصاب لانهم محترفين في هذا الشئ
من خمسه سنوات و الشبكة في بيتنا سيئه جدا .. ولا زالت
بصراحه اللي كان يستخدم شبكة الجوال في بيتنا ما كان يبغى الجيل الثالث ولا اي شئ من الخرابيط هذي .. كان يبغى بس شبكة يمسك فيها خط الاتصال ..
ولما نتصل عشان نقلهم ترى شبكتكم في المنطقه هذي سيئه .. نسمع و لمده لا بأس بها الجملة الاروع في هذي الشركه  “جميع مزودي الخدمة مشغولين في خدمة عملاء اخرين .. انتظاركم محل اهتمامنا “   
.

.

قارأ المزيد »

.

أذكر إني في يوم كنت مع اصحابي في الجامعة قاعدين نتكلم اننا نبغى يكون لنا موقع خاص و محد يقدر يدخل عليه غيرنا
فيه فضايحنا و بلاهتنا و منه نقدر نقطع في بعض براحتنا
قلت لنواف على هذا الشئ و قلي انوا هو يفكر في الموضوع ..
و مرت الايام وبعد فتره نواف قلي خذ هذا الرابط و اضيف اصحابك في هذا الموقع و اديني ارآئهم
وبصراحه كان فيه كل اللي احنا نبغاه ..

.

موقعنا انا و صاحبي كان تحت خدمة اسمها ” غواصة “

‫

.

*‬ ايش هيا خدمة ” غواصة ” ؟
خدمة تعملك “موقع خاص” ومحد يقدر يطلع على هذا الموقع غير الناس اللي أنتا تضيفهم و تسمح لهم انهم يدخولوا الموقع و يشاركوك فيه ..

‫

.

*‬فكرة الخدمة :
تعتمد فكرة هذي الخدمة على انوا أي مجموعة اصحاب او أهل يعملوا حساب ليهم ويتواصلوا براحتهم وبخصوصية تامة .. يعني محد من برا مداه يشوف أي شي لو ايش ما صار (بإذن الله )

.

* ليه غواصة؟
في البداية كنت أقول شئ حلو لما تكتب شئ و تلاقي اغلب اللي يعرفوك قرأوه ..
لكن كانت نقمه بعد فتره لانها حدت من حريتي صرت أحسب حساب الحرف اللي اكتبوا تحسبا انوا يجي واحد انا ما قصدتوا بكلامي يفهم اللي كتبوا غلط و انا كل اللي أبغاه إني أتواصل مع الأشخاص القريبين مني عن طريق النت ..
فعشان كذا كان قراري انا و صاحبي انوا يكون لنا موقعنا الخاص بينا و بس ..

.
‫

*‬ الخدمات في ” غواصة ” :

.

طيب زي ما انتوا شايفين هذي القائمة هيا القائمة الرئيسية للموقع ” غواصة ”
الموقع يقدم خدمات اساسية حأذكر اثنين منهم :
•     الاخبار السريعة : تضيف الاشياء اللي تبى توصلها لأصحابك ( او أهلك .. او اي مجموعة )     و تكون جملة مهي طويلة  يعني “خبر على الطاير بالعاميه”

.

•    المفضلة : هذا القسم شفتوا من الاشياء الحلوه .. لانوا مداك تنقل اي رابط في النت عجبك و اصحابك مداهم يشوفوه من الموقع سواءً اذا كان يوتيوب و لا يسمعوه اذا كان مقطع صوتي

.

وبصراحه في خاصية مره عجبتني .. في “الاخبار السريعة ” لما شخص يكتب في الموقع خبر مو بس مداه ينشروا في الموقع ..لا كمان مداه يرسله رسالة جوال للي معاه في الموقع اذا اختار خاصية الإرسال عبر الـ  SMS

.

* كيف اقدر اجرب الخدمه ؟!
مداك تجرب الخدمه بدون حتى ما تشترك او تكتب حرف واحد كل مافي الموضوع انك تدخل على موقع غواصة
http://gwasah.com/
بعد كذا اضغط على الايقونة اللي مكتوب فيها ” جرّب الخدمة ”

راح تنتقل مباشرة على صفحة تسجيل دخول
كل ما في الامر انك تضغط على زر “دخول” و راح تجرب الخدمه بكل سلاسه

.

* اخيرا :
‫”في ايقونة في اعلى صفحة الموقع مكتوب فيها ” تحدث مع الدعم الفني ” بأمكانكم السؤال في أي شئ هناك و سوف يتم الرد على جميع اسئلتكم المتعلقه بالموقع ان شاء الله “‬

.

اتمنى انكم تجربوا الخدمه و تنال على اعجابكم ..
و اتمنى إني اكون كفيت و وفيت في شرح هذي الخدمه ..
طبعا لزواري الكرام أي استفسار مداكم تكتبوه هنا و راح أرد عليه إن شاء الله