.

.

الحمدلله حمدا يليق بجلاله و عظيم سلطانه

..

ليلة السابع و العشرين (( يوم السادس و العشرين ))

يوم مميز باالنسبه لي ..

لانوا في هذا اليوم ابدأ احط اهدافي للسنه الجديده

عشان ما ابالغ مش كل الاهداف احققها

اللي يحصل انوا اكسل بعض الاحيان

وبعض الاحيان اكتشف انوا الهدف اللي حطيتوا لسنتي ما يناسبني

.

.

شنوا اهدافك في السنه اللي راحت ؟

كان عندي هدفين اساسين

الاول : اتوسع في مجال البرمجه

والحمدلله هذا الهدف مشيت فيه تمام

يعني اليوم انا ما اعتبر نفسي سيئ في لغة الجافا

و بدأت في البي اتش بي .. و ماشي فيها الحمدلله

و اتعلمت شئ خطير .. و يعتبر فلسفه مهمه في البرمجه:

مو لازم تكون تعرف دوال كثيره

المهم انك تعرف الدوال المهمه

و تعرف كيف تستخدمها اذا احتجتها

وكل ما كان كودك بسيط راح تتسهلك مسألة التعديل عليه

.

.

الثاني : اني ازبط جسمي

طبعا في شئ لازم تعرفوه .. انا مني دب

لكن مني نحيف

يعني وزني ع طولي .. كويس

لكن الهرجه و راء هذا الهدف .. انوا مشيت مع ناس في الجامعه ما شاء الله

مهتمين بنفسهم و اجسامهم خطيره ..

بصراحه احس نفسي بينهم انوا جسمي مهرهر (( مهرهر = مبهدل ، سيئ ))

فقلت خليني ابدأ اتمرن و امكن جسمي يزبط

لكن اللي اكتشفتوا انوا الشغله اصعب مما تخيلت

الشغله فيها تعب و يبغالها واحد فااااضي

* فهذا الهدف شطبتوا من اللسته الحاليه

.

.

.

……………………..   ~~~~~   مدونتي    ~~~~~    ……………….

.

.

و اليوم هذا مميز كمان

لاني قبل ٣ سنوات من اليوم فتحت هذي المدونه

يعني المدونه اكملت عامها الثالث ..

و من خلال تجربتي البسيطه .. اكتشفت اني مدون متواضع جدا و قد اكون سيئ

في السنه الاخيره مواضيعي لم تتجاوز ٢٥ موضوع

مسألة الكتابه و مراجعة المواضيع قبل النشر

مرهقه لي ..

فأنا افكر جديا بتحويل نشاط هذه المدونه

قد تكون الوجهه الجديده وجهه للحديث عن التقنيه و الاكواد البرمجيه و شروحات بسيطه

او تكون متابعة لحسابي في تويتر و يوتيوب

او مجرد فيديوهات (( بودكاست ))

يعني فيه شغلات كثيره في بالي بس الى الان ما رسيت على شئ

لكن مسألة كتابة اليوميات .. و الخواطر

اعتقد انها توفت عندي

.

.

بصراحه ما عندي فكره فين راح تكون الوجهه الجديده .. ولكن اشكر جميع من تابعني

و اشكركم على تواصلكم

والله يختار اللي فيه الخيير

…

طلب بسيط :

اللي عندوا اي ملاحظات علي او نصيحة وحابب انوا هو يقولي هو بدون ما يكشف عن شخصيتوا و بكل سريه

يدخل على هذا الموقع :

Majedoh

تعلمت خلال تجربتي البسيطه جدا ..  انوا في حياتك اليوميه تحتاج عشان تنجح و تسوي اللي انت تبغاه ..  تحتاج صفتين بسيطتين :

.

الاولى :

كن مداقشاً :

* “تعريف كلمة مداقش  .. تجي بمعنى مكافح “

.

يعني لا تيأس .. ولا تكون سلبي

وحط تحت لا تكون سلبي مليووون خط احمر ..

السلبي انسان دايما يسأل السؤال هذا ..

يعني لو سويت كذا ايش راح يصير ؟؟!!

.

هذا السؤال في قمة الاحباط و الاستسلام للأمر الواقع

و بصراحه ما افضل اتعامل مع الاشخاص السلبين ..

لانوا بعد فتره بدون ما اشعر الاقي نفسي صرت زيهم

.

كونك انسان سلبي ..يعني انك مسلم لكل ما يحدث لك ..

تلوم الحظ و المجتمع و الوقت و حتى السواق اللي عندكم في البيت ..

..

في الحقيقة انوا بعض الاشياء و المواقف يحتاج لها محاولات و محاولات جاده عشان تقدر توصل اللي انت تبغاه

ممكن تقرر تكون سلبي في لحظة و انت ما تدري انوا بقي لك شئ بسيط و كنت راح تأخذ اللي انت جيت عشانه ..

ترى السلبيه مراحل .. في عالم اعرفها وصلت بيها السلبيه انوا ما يجرب شئ ..

لانوا احتمال انوا ما يحصل اللي هو يبغاه  .. فهو يريح راسوا من البداية

” تذكر لا يوجد انسان ناجح توجد لدية خصلت السلبيه “

.

الثانية :

لا تربط حياتك الا بخالقك :

الارتباط معناه عميق و كبير جدا ..  ” واظنوا اكبر مني “

لكن انا حأخذ جزيئ  “  تصغير جزء ” من الارتباط

عادة ما يقيد الانسان و يمنعه من فعل اشياء كثيره هو ارتباطه بأشياء اخرى يخاف زوالها

بعد تجربة اطلب منك انك لا ترتبط بأي شئ سوا خالقك سبحانه وتعالى..

ارتباطك بشئ يقيد حركاتك و تصرفاتك

.

هذا مثال من حياتي الدراسيه :

بعض الطلاب اللي اشوفهم في الجامعه الاحظ عليهم انهم مرتبطين بمعدلاتهم بشكل كبير

و خايفين انوا المعدل يطيح .. فهذا الخوف اثر على تصرفاتهم

فمثلا لو طاح معدلهم .. تلاقيه زعلان و يتخبط يمين و يسار و من غرفة دكتور للثاني و يشوف لوا احد يكلم الدكتور الفلاني .. اهم شئ معدلوا لا يطيح

هذولا انا اشوفهم من وجهة نظري فقدوا شئ كبير من متعة الدراسه ..

كونك تجي الجامعه بدون ضغوط نفسيه و تجي عليك الاختبارات بدون ما يجيك ارق و قلق ..

انت كذا حصلت ع متعة الدراسه ..

المعنى من هذا الكلام .. انوا انت تجتهد و تذاكر و تسوي اللي عليك و تدعي ربك انوا يوفقك

و ارضى بالشئ اللي الله كتبوا لك ..

رضاك راح يعطيك راحه لا يمكن ان يشعر بها الا من خلا من اي ارتباط ..

…….

هذي الجاحتين جربتهم

وراح تساعدك انك تكون انسان يحصل على ما يريد و في نفس الوقت راضي و مرتاح البال بما حصل له..

^.^

مين كان يتوقع قبل الف سنه انوا الانسان ممكن يصنع شئ من حديد و يحط داخله كراسي و يستخدم هذا الشئ للطيران ..

.

مين كان يتوقع قبل ١٠٠ سنه انوا الانسان مداه يرسل موجات غير مرئيه الى ابراج و الابراج ترسلها لابراج ثانيه .. هذا كلوا عشان يتصل بشخص …

.

كثيره هي الاشياء التي تستحق الوقوف عندها و التأمل ..

.

لكن ثق تماما .. خيال الانسان ممكن ان يصبح حقيقه بعون الله

وان المستحيل غير موجود في هذا الكون ..

*****

هذا مقطع لشباب يحاولوا يمشوا فوق المويه … (( طبعا ما ادري اذا المقطع ملفق ولا حقيقي ))

مقطع مجنووون

.
.
.

في سؤال لو فترة ينطنط في دماغي ..

السؤال مبني على وقائع ..

،

.

طيب الوقائع هذي كالاتي ..:

.

.

خلق الله ادم .. و اكيد انوا ادم كان يتكلم لغة من اللغات (( بصراحه انا ما اعرف ايش كانت هذي اللغة )) والدليل انوا ادم كان يتكلم لغة معينه .. انوا ابليس كان يوسوس لادم و يحاول يغويه .. فيعني انوا ادم كانت عندو لغة ..

.

نزل ادم الى الارض و حواء .. فكانت بينهم لغة يتكلموا بيها ..

يعني كانت لغة واحده لانهم كلهم على بعضهم ٢ .. يعني مو معقول انوا ادم يتكلم عربي و حواء تتكلم عبري ..<< مثال طبعا

.

طيب دام انها كانت لغة وحده من فين جات باقي اللغات ؟؟

من فين جات كل هذي القواعد و الشروط لبناء الجمل .. و من فين جات كل هذي الحروف ..؟؟

.

مو المفروض و الطبيعي انوا اولاد ادم يتكلموا نفس لغة ابوهم ..

و الاجيال اللي بعدها مو المفروض تتكلم نفس اللغة حقت الاجيال اللي قبلهم ؟؟

.

يعني معقول انوا في واحد كان جالس في يوم كذا لحالوا و اخترع لغة و ركب عليها حروف و بعد كذا صارت هذي اللغة شئ يتكلموا  و يتواصلوا بيه البشر  !!

.

يا ايها الملأ افتوني في امري ..

^.^

قبل كم يوم وانا اتصفح في النت .. شدني مقطع في اليوتيوب (( المقطع شفتوا عند عمر العمري ))

المقطع هذا جدا خطيير ..

اتركم معه و لي تعليق

.

.

:: تعليقي  ::

جميل جدا ان الغرب قام بذكر انه كانت لنا حضاره في يوم من الايام ..

لكن من الغريب جدا اننا لم نستطع ان نمثل هذه الحضاره الا في بعض افلام الكرتون << والتي بالمناسبه تصنف كأفلام كرتون سيئه الجوده و قديمه جدا ..

اما في التمثيل التلفزيوني فأقصى ما وصلنا اليه هو تمثيل الحجازي و النجدي و غيرها من الاستخفافات بعقل المشاهد

.

.

اترك لكم باقي التعليقاااات

حال هذي الدنيا متقلب فلا تتعجب عندما تسمع هذي القصة عن مجموعه ناس

.

.

هؤلاء الناس كانوا في يوم من الايام من اغنى الناس في الارض

و كانوا يأتيهم  صاحب كل حاجه …

واملاكهم بلغ صيتها المشرق و المغرب ..

و استفاد من خيرهم القاصي و الداني

لكن مع الايام ماتوا واحدا تلو الاخر ..

و خلفهم من بعدهم ابناءهم فكانوا شر خلف لخير سلف

استحقروا جميع ما وصل اليه ابائهم وضيعوه

و انتهى هذا الجيل و جاء جيل من بعده (( جيل الاحفاد ))

هذا الجيل لم يرى النعيم الذين وصل اليه اجدادهم

فبحثوا عن اي اصحاب املاك و خيرات ليصيروا اتباع لهم

.

.

و تستمر السلسلة الزمنيه في القصة و كل زمان يأتي يكون اسوء من سابقه على هؤلاء الفئه ..

الفئه التي كانت بدايتها جدا رائعه ..الفئه التي ضيع جيل منها امجاد اجدادهم

لتحولوا من ساده الى عبيد ..

.

.

قد تكون هذه القصه الصغيره مبهمه لكن دعني اوضحها لك

هل تريد ان تعرف من هذا الجيل ؟؟

هي تريد ان تعرف اجداد هذا الجيل .. الاجداد الذين صنعوا المجد ؟؟

اذا كنت تريد ان تعرف فتابع بقية ما سوف اكتبه

. قارأ المزيد »

.

.

كل ما جيت في وصف حبيبي ترددت

كل ما وصفته .. ارجع اقول لا ما وصفت

و كيف ما اتراجع في كلامي و انا بجماله افتتنت

حبيبي كله رقه و دلع .. حبيبي له نظرهٍ بيها الجمال ابتدأ

سحرتني خضر عيونوا و كلامه اللي على قلبي احلى من العسل

في جماله قالت عيوني ما شفت بها الجمال احد

وصدق من قال ثلاثة يذهبن العقل : الخضره و المال و الوجهه الحسن

وحبيبي جمع بين جمال الطبيعه و جمال البشر

.

قبل كم يوم ارسلي اخويا ” فهد ” رسالة على الايميل عن عبقري رياضيات

يسوي عمليات ضرب بشكل جدا سريع و نواتجوا صحيحه ١٠٠ ٪ ..

.

بس قبل ما اوريكم المقطع عندي لكم قصه صغيره تعكس مدى عبقريتي الشخصيه في هذا العلم

بما اني لحقت النظام القديم اللي في المدارس واللي كانت فيه الاختبارات من ٨ درجات

و اذكر انوا كانت سنه اولى بس هيا اللي فيها تقويم مستمر << اذا ما خانتني الذاكره طبعا >>

.

على العموم هذي المقدمه تكفي لرواية القصه

في ليلة زي هذي الليالي اللي يختبروا فيها طلاب المدارس << الله يكون بعونهم

كان عندي اختبار رياضيات << وكنت في الابتدائي يا سنه ثانيه او ثالثه >>

قعدت معايا امي ” الله يرحمها “  تعلمني الجمع

و مسائل في الجمع و الطرح .. ليين ما خلاص حست هيا اني متمكن من الجمع و الطرح واني استعديت بشكل ممتاز للإختبار

.

لكن هذا الشئ تغير على ورقة الاختبار ..

لاني جبت ٦ من ٨ .. طبعا مداكم تقولوا انها نتيجه كويسه

لكن السؤالين اللي غلط فيهم كانت تافهه

اللي اذكروا سؤال واحد منهم اللي هوا :

٦ + ٦ =

طبعا انا مجاوب عليه و بكل ثقه و محدد على اجابتي كمان

٦ + ٦ = ١١

غلطتي كانت اني كنت اعد من الرقم اللي قبلوا عشان اجمع عليه اللي بعدوا يعني كنت اعد زي كذا :

٦ ٧ ٨ ٩ ١٠ ١١

طبعا هذي الغلطه دفعت ثمنها غاليا .. لاني ذاك اليوم اكلت ضربة محترمه

و من ذاك اليوم صرت كل ما يسألني احد  : كم ناتج هذا الشئ ..

اذا ما كان معايا اله حاسبه .. اقولوا ما اعرف .. او اقولوا ترى الناتج حيكون قريب من كذا

لكن حرمت اعطي نواتج و اسوي واثق ..

.

وكويس جدا انهم سامحين استخدام الالة الحاسبه في الجامعات ولا كان بانت الفضايح مزبوط

.

نرجع للعبقري (( ساحر الرضيات )) و مشاهده ممتعه

” لغتوا الانجليزيه مهي صعبه ”

بداية عام دراسي شاق نوعا ما ..
بدأت عامي بقرار ترك العيش في جده ..
و التزمت بالمقولة اللي تقول ” بيتك بيتك يا ولد “..
و جاء دوامي في الجامعه هذي السنه كأسوء دوام على مر السته الاترام اللي فاتت ..

و المواد اللي منزلها يبغالها مذاكره ومتابعه..وهذي الكلمات مسحتها من قاموسي من يوم اتخرجت من التوجيهي “لانوا اللعب والتريقة تجري في دمي “

في ثاني اسبوع في الجامعة وانا جالس في معمل قاعد اسوي قاعدة بيانات في الأكسس..

جاء واحد من اصحابي جدوله زي جدولي ..
قلي : ماجد .. تدري لنا دحين في الجامعه ١٠ ساعات ..
“انا انصدمت” وبنظرة انسان تحولت المنطقة اللي تحت عيونه سودا من كثرة التعب و الطفش.. 
قلت لوا: لا تمزح ..
لكن مع مرور الوقت تقبلت الواقع المرير ..  و تقبلت انوا ارجع البيت بعد ١٢ ساعه و نص من لحظت خروجي منوا ..  
‫‬
وهذا السبب اللي خلاني اقطع عن المدونة لانوا ما كان لها وقت بصراحه ..
و غير كذا قاعد اتابع مع نواف الموقع اللي قريب راح يبدأه .. و اتمنى انوا يحقق اللي نتمناه ..

اعتذر عن انقطاعي عن المدونه في الفتره السابقة ..
ولكن هذا هو حال جدولي .. فما هي احوال جداولكم ..

” للتنوية : البس اللي في الصوره هذي يجسد حالتي و بكل شفافيه في لحظات الصباح الباكر و النفس الاماره بالسوء تقولي لا تروح وكبر مخدتك “ 

.

.

في يوم وانا جالس اطالع القمر لحالي
جاء على بالي احبابي
و تمنيت اشوفهم قدامي
تمنيت اسولف معهم عن فرحتي و احلامي
و يشاركوني في سهرتي و يحلو لي مسائي

ومن يوم بدأت اتخيلهم جاني سؤال على بالي
ليه يوم كانوا قريبين كنت جافي !!
وانت تحبهم وبدونهم تقاسي
قلت يا نفس اسكتي و خلي حالي

لا تلوميني بعد ما حبيتهم و تقوليلي اني قاسي
صح انا ما اقدر على بعدهم لكن بوصالهم اكون شخص ثاني
حبايبي في .. بستمهم و ضحكتهم ودمعتهم .. يحيوا ايامي
يجددوا بكلمة ماضي راح و يشتتوا ببسمه كل احزاني
هما شمعة ايامي و يستحقوا يسمعوا مني احلى كلامي

فأرجوكي يا نفسي لا تشككي ف حبي و اهتمامي
لانوا حبهم بيبقى في قلبي مهما مرت عليّ اعوامي