.

.

الحمدلله حمدا يليق بجلاله و عظيم سلطانه

..

ليلة السابع و العشرين (( يوم السادس و العشرين ))

يوم مميز باالنسبه لي ..

لانوا في هذا اليوم ابدأ احط اهدافي للسنه الجديده

عشان ما ابالغ مش كل الاهداف احققها

اللي يحصل انوا اكسل بعض الاحيان

وبعض الاحيان اكتشف انوا الهدف اللي حطيتوا لسنتي ما يناسبني

.

.

شنوا اهدافك في السنه اللي راحت ؟

كان عندي هدفين اساسين

الاول : اتوسع في مجال البرمجه

والحمدلله هذا الهدف مشيت فيه تمام

يعني اليوم انا ما اعتبر نفسي سيئ في لغة الجافا

و بدأت في البي اتش بي .. و ماشي فيها الحمدلله

و اتعلمت شئ خطير .. و يعتبر فلسفه مهمه في البرمجه:

مو لازم تكون تعرف دوال كثيره

المهم انك تعرف الدوال المهمه

و تعرف كيف تستخدمها اذا احتجتها

وكل ما كان كودك بسيط راح تتسهلك مسألة التعديل عليه

.

.

الثاني : اني ازبط جسمي

طبعا في شئ لازم تعرفوه .. انا مني دب

لكن مني نحيف

يعني وزني ع طولي .. كويس

لكن الهرجه و راء هذا الهدف .. انوا مشيت مع ناس في الجامعه ما شاء الله

مهتمين بنفسهم و اجسامهم خطيره ..

بصراحه احس نفسي بينهم انوا جسمي مهرهر (( مهرهر = مبهدل ، سيئ ))

فقلت خليني ابدأ اتمرن و امكن جسمي يزبط

لكن اللي اكتشفتوا انوا الشغله اصعب مما تخيلت

الشغله فيها تعب و يبغالها واحد فااااضي

* فهذا الهدف شطبتوا من اللسته الحاليه

.

.

.

……………………..   ~~~~~   مدونتي    ~~~~~    ……………….

.

.

و اليوم هذا مميز كمان

لاني قبل ٣ سنوات من اليوم فتحت هذي المدونه

يعني المدونه اكملت عامها الثالث ..

و من خلال تجربتي البسيطه .. اكتشفت اني مدون متواضع جدا و قد اكون سيئ

في السنه الاخيره مواضيعي لم تتجاوز ٢٥ موضوع

مسألة الكتابه و مراجعة المواضيع قبل النشر

مرهقه لي ..

فأنا افكر جديا بتحويل نشاط هذه المدونه

قد تكون الوجهه الجديده وجهه للحديث عن التقنيه و الاكواد البرمجيه و شروحات بسيطه

او تكون متابعة لحسابي في تويتر و يوتيوب

او مجرد فيديوهات (( بودكاست ))

يعني فيه شغلات كثيره في بالي بس الى الان ما رسيت على شئ

لكن مسألة كتابة اليوميات .. و الخواطر

اعتقد انها توفت عندي

.

.

بصراحه ما عندي فكره فين راح تكون الوجهه الجديده .. ولكن اشكر جميع من تابعني

و اشكركم على تواصلكم

والله يختار اللي فيه الخيير

…

طلب بسيط :

اللي عندوا اي ملاحظات علي او نصيحة وحابب انوا هو يقولي هو بدون ما يكشف عن شخصيتوا و بكل سريه

يدخل على هذا الموقع :

Majedoh

.

طبعا اغلبكم يعرف مطعم كودو .. و اغلبكم قيد اشترى من هذا المطعم ..

عني انا فمطعم كودو كنت ما ابدي عليه مطعم .. طبعا اذا جا في بالي اني اتعشى سندوشتات..

.

و بالفعل جا في بالي انا و الاخ العزيز نواف و معانا واحد كمان .. اننا في يوم نتعشى سندوشتات ..

و رحنا لكودو .. و انا و اقف عند المحاسب ..

طالع فيا نواف و قلي : شوف دحين راح تطلب وجبه من الحجم الصغير و راح يقولك ترى ما في الا الوسط و الكبير ..

طالعت فيه و قالتلوا .. ما عندي مشكله ايش فرقت ..

<< انا ما جا على بالي انوا هذا المطعم ناويلي على نصبه محترمه >>

.

المهم طلبت و دفعت و قعدت على الطاوله

و احنا قاعدين نتظر الطلب .. قعدت احسب بكم سعر الوجبه و اتأكد من الفاتوره ..

كان عددنا ثلاثه .. و الفاتوره تقول انوا حسابنا ٦٦ ريال .. و سعر الوجبه ١٧ ريال ..

<< مع الجوع دماغي كان حاطط لوحه ” راجعنا بعدين يا الحبيب ..” >>  

.

المفروض دام انوا سعر الوجبه ١٧ ريال و احنا ثلاثه يكون الحساب ٥١

و بما انوا مافي الحجم الصغير يعني زود على الحساب ٣ ريال حقت الحجم الوسط  راح يطلع المجموع = ٥٤

.

طيب من فين جات ٦٦ هذي ؟؟    

بعد استنتاجات خطيره اخطر من استنتاجات المحقق توغو  

<< شخصيه تحفه في فلم الكرتون اللي مو راضي يخلص كونان >>

اكتشفت انوا الكابتن اللي على الحساب لما جا يسجل طلباتنا ما سجلها كوجبات ..

لا .. المحاسب الخطير راح طلب لنا السندوشتات لحال و البطاطس و السفن لحال ..      

.

مع انوا الطلب اتأخر بس صدقوني لما اقولكم انوا اثبتت الدراسات الفسيولوكمياويه انوا الانسان لما يكون جيعان يفقد تركيزوا .. يعني ما وصلت لهذا الاستنتاج الا و الطلب جاهز ..

.

بس قبل ما اخذ الطلب رحت عند المحاسب بأتفاهم معاه على الفاتوره ..

بعد اخذ و عطا نطق المحاسب صاحب الجعصه الخطيره ..

قلي : هذا هو نظام الشركه ..

..

بس بس وصلنا .. يعني الشركه قالتلك انك تسجل الطلبات كذا .. !!

يعني هذا هو نظام كودو الجديد .. انصب على المشتري .. و استغل الزباين !!

ما لقيت عندو رد .. فمن وقتها حلفت انوا هذي اخر مره اشتري من كودو

و الحمدلله يا مكثر المطاعم في وطنا العزيز ..

……..

اخيرا

انا مني من النوع اللي يقاطع منتجات او شركات ،، ولا ادعم اي مقاطعه اياً كانت

لكن ما ارضى اني استغل بأي طريقه  .. عشان كذا راح اكسر القاعده ..

و من اليوم انا مقاطع لمطعم كودو ..  

…..

تحديث :

قيمة الساندوشت اللي قمت بطلبوا ١٢ ريال بدون وجبه ..

.

.

.

.

.

.

.

.

.

.

،

.

.

.

.

.

و بحسب نظام كودو الجديد دفعت ٢٢ ريال على الوجبه ..

يعني تقريبا  دفعت قيمة سندوشت ثاني  !!

* (( الصوره مأخوذه من موقع كودو ))

………….

اي احد لو تجربه مع مطعم كودو يكتب عنها .. وراح اضيفها عندي:

نواف ..    كودو النصااابين !

قروب في الفيس بوك ..

انقطعت فتره طووويله عن التدوين  .. و اعتقد انوا السبب كان هو انشغالي بالدراسه .. مع شوية كسل عن الكتابه ..

والحمدلله انوا انتهى هذا الترم على خيير .. بقي الدرجات و ان شاء الله تكون تمام

…

اما موضوع التدوينه هذي .. عن عباره لطيفه ترددت كثيرا هذا الترم بالذات

.

ليه هذا الترم ؟!

.

لانوا الترم هذا كانت عندنا ماده برمجه و في نهاية الماده لازم تسلم مشروع

ويا ريتها المسأله بس ع المشروع و تسليموا .. لا دكاترتنا الاعزاء راح يناقشوا المشروع اللي انتا عملتوا .. و راح يكون ع مشروعك ٢٥ درجه ..

و عشان تأخذ درجه ممتازه “” لازم تركز يا ابني على الكووووود اللي بتكتبوا “”

* الكووووود : بضم الواو عشان تنطقها زي ما ينقطها حبايبنا ..

.

طيب و بدأت الشغل في البرنامج .. و ما احكيكم عن الليالي الظلماء اللي قعدت اشتغل فيها ع البرنامج ..

(( مره يطلع لي خطأ و يأخذ مني ساعه بس عشان الاقيه .. و مره مشكله في البرنامج .. و هيا شيل معاك باليوم او اليومين لين ما تزبط المصيبه اللي حصلت ))

….

و استمريت ع هذي الحال ٣ اسابيع و ليين ما انتهيت من البرنامج ..

** The Program was about FTP (server& Client ).1

وجاء موعد تسليم البرنامج و مناقشتوا .. طبعا كنا مجموعه مكونه من ٥ طلاب ..

…..

سلمنا المشروع و بدأت المناقشه .. طلب مننا الدكتور اننا نشغل البرنامج .. شغلنا و سوينا اللي هو يبغاه .. قالنا اوكي .. و كان هذا اخر شئ يرتبط بالكود و البرنامج ..

و بدأت الاسئله اللي مال امها صلاح بالكود و البرنامج ..

و شويه الدكتور يقول : كلكم كذابين .. اللي سوا الكود ماجد بس .. (( طبعا ما ادري كيف عرف هو شم ع قفا يدوا ولا ايش اللي حصل ))

قام الدكتور سألني سؤال بطريقة استحقار اليمه .. * هنا اخلاقي قفلت * .. قمت قلتلوا ما ادري ..

راح سأل اللي جنبي .. رحت عباطه جاوبت ع سؤالوا ..

قام طالع فيا الدكتور و قالي : انتا ما كتبت الكود من فين جبتوا ؟؟

طبعا لما قالي كذا … اتذكرت الثلاثة الاسابيع اللي قعدت اكتب فيها الكود و التعب اللي مريت فيه ..

و حسيت انوا شياطين الجن بدأت تنطنط في راسي

قلتلوا .. شوف الكود عندك .. (( طبعا هو ما طالع في الكود نهائيا )) .. قام صرف الهرجه .. و قالنا انوا مستوانا سيئ .. و ما نتوقع درجات كويسه

….

بعد ما خلصت المناقشه و خرجنا من عندوا .. جاء في بالي .. دحين ايش الفرق بيني و بين العيال اللي مسوين الكود عند المصري ؟؟

لكنا اتعاملنا بنفس الطريقه كلنا راح يخسف بينا .. و اولا و اخيرا هو ما طالع في الكود اللي مكتووب ..

….

بس زادت قناعتي انوا احنا مجتمع متخلف علميا .. حتى في الاماكن اللي المفروض يكون فيها نسبة التخلف اقل تظهر لك عينات زي الدكتور الحبيب هذا .. اللي ما ادري ليش حاطينوا عندنا في الكليه ..

….

على العموم في ختام موضوعي الدرامي .. احب اقول اللي معانا في كلية الحاسب .. او اي مبتدئ في الجافا ..

اني راح انزل كل برامج الجافا اللي انا سويتها و اللي اخذتها من غيري على مدونتي خلال فترة الصيف ان شاء الله

و الله يعين و يوفق الجميييع ان شاء الله .. . 

قوانين الواجب

1- اذكر اسم من طلب منك حل هذا الواجب.

2- تحدث عن ستة أسرار قد لا يكتشفها من يقابلك للمرة الأولى.

3- حول هذا الواجب إلى ستة مدونين، واذكر أسماءهم مع روابط مدوناتهم في موضوعك.

4- اترك تعليقا في مدونة من حولت الواجب إليهم، ليعلموا عن هذا الواجب.

……………………………………….

1_ أرسلتلي الواجب  المدونه ”بيان “

٢- اما الاسرار السته للإنسان اللي اول مره يقابلني فيها امكن ما يكتشفها ..

طيب طيب

كثير المحشات و التريقه – مزاجي ( و مزاجي محترررف و متمرس ) – اعتقد اني طيوب – لو قعد في مكان مكتوم اخلاقي تنعدم ( وقد تصل الى الصفر )  – اكره الحر -  ما ارد على جوالي الا ف المناسبات السعيده

٣- اما ع تحويل الواجب .. فاللي يبغاني احولوا هوا يديني خبر.. لاني ما ابغى اشغل احد و هذي الفتره فتره اختبارات .. (( الله يوفق اللي لسى باقيلهم )

قبل كم يوم وانا اتصفح في النت .. شدني مقطع في اليوتيوب (( المقطع شفتوا عند عمر العمري ))

المقطع هذا جدا خطيير ..

اتركم معه و لي تعليق

.

.

:: تعليقي  ::

جميل جدا ان الغرب قام بذكر انه كانت لنا حضاره في يوم من الايام ..

لكن من الغريب جدا اننا لم نستطع ان نمثل هذه الحضاره الا في بعض افلام الكرتون << والتي بالمناسبه تصنف كأفلام كرتون سيئه الجوده و قديمه جدا ..

اما في التمثيل التلفزيوني فأقصى ما وصلنا اليه هو تمثيل الحجازي و النجدي و غيرها من الاستخفافات بعقل المشاهد

.

.

اترك لكم باقي التعليقاااات

.

.

في محاضره التقنية اليوم تكلم دكتورنا العزيز عن صافي الوقت ..

كلامه خلاني اعيد حساباتي في وقتي ..

و طرح سؤال جدا مهم ..

انا يومي فين يروح ؟؟!!

وبعد عمليات النتقيب الدماغيه و عمليات الجرد الفسيولوجيه تبين انوا تقسيم يومي كالاتي ..

نوم ( ٩ ساعات = يعني بالقليل )

في الجامعه ( ٤ ساعات = طبعا اغلب الايام ٤ ساعات لكن بعض الايام اكثر )

و خط مكه جده ( ساعتين = روحه و رجعه )

مع اهلي و مشاغل اخرى  ( ساعه .. و اذا ضربت الحمى ساعتين )

البلاي ستيشن ( ساعه )

و الكمبيوتر ( ٧ ساعات تقريبا )

.

.

يعني بحسبه بسيطه جدا ساعاتي الاجتماعيه خلال ايام الاسبوع صفر

و هذا الشئ اعاني منه و بشكل كبير ..حاولت الترم اللي فات اني ازبط جدولي لكن المشكله انوا الوقت اللي اكون فيه فاضي

يكون وقت غير مناسب للبشر خاصة ايام الاسبوع …

.

،

طبعا اللي يقرأ اني اجلس ٧ ساعات على الكمبيوتر كل يوم .. يقول هذا شكلوا مكسر الدنيا من البرامج و الاشياء المفيده اللي قاعد يقراها ..

لكن للأسف السبعه الساعات هذي اغلبها تروح في الافلام و المسلسلات و مقاطع اليوتيوب و تويتر ( ترى تويتر ادمان )

و يجي نهاية اليوم و في اشياء كثيره اكون طنشتها ..

و لذلك اعتذر عن فترات انقطاعي عن التدوين … و لكن ان شاء الله راح ارجع ادون من جديد

.

لكن سؤال لكم .. كيف تقسموا وقتكم ؟؟!!

في امثال كنت اسمعها ايام زمان كانت تجيب لي المغص في عيني و شد عضلي في اذني

من هذي الامثال .. من جد وجد

ولكل مجتهد نصيب

احس لما اسمعها انوا كأنوا اليوم صباحيه سبت .. وما ليا نفس اروح المدرسه

المهم ايّا يكن تحمله هذه الجمل من معاني فهي صحيحه

.

.

انتهى الترم اللي فات على خير الحمدلله .. بدرجات ما اتوقعتها ..

الحمدلله .. انوا انتهيت من قومت الصباح .. و الدوام المتقلب

وكويس اني افتكيت من كم شخصيه كانت ترفع ضغطي بسهوله جدا ..

.

.

عموما سويت عرض لبعض الصور اللي صورتها خلال هذا الترم .. وبعض  احتفالات اخر يوم من هذا الترم

و اتمنى انوا العرض يعجبكم

” اللي ما يسمعوا اغاني يكتموا الصوت “

(( الرسمه عجبتني .. ))

.

كنت مع صاحبي في الجامعة اللي اشوفوا اكثر من اهلي في البيت ..

و قلي تدري انوا الكمبيوتر يأخذ كل يومنا .. حتى لو ما عندنا شئ ممكن نضيع ٣ او ٤ ساعات

قلي لو في يوم جربت ما اشتغلت على الكمبيوتر نهائيا راح تلاحظ انوا يومك صار فاضي و عندك وقت تخرج فيه و تقعد تقرأ شئ

و بما اننا دايما نتعابط على اي شئ  .. قتلوا بس يا شيييخ !.. مو لهذي الدرجه

و ما عدا على حوارنا هذا يوم .. وحدث غير المتوقع ..

لفظ هاردسك جهازي انفاسه الاخيره .. وكنت افكر بتكسير الجهاز جديا بعد ما راحت الملفات و الصور و كل الاشياء اللي كانت فيه

طبعا هذي كلها ما فرقت عندي بصراحه ..

لكن في صور لناس مهمين و غالين بالنسبه لي و لقطات فيديو لهم  .. كنت اتمنى انها تبقى ذكرى حلوه

طبعا كلها راحت .. و من ذاك اليوم صرت غير مهتم بأي شئ

و قعدت بدون كمبيوتر ما يقارب اسبوع .. و اكتشفت انوا كلام صاحبي صح والله ..

العيشه بدون كمبيوتر صعبه عليا .. خاصه اني من النوع اللي متعود اني اشيك على الايميل كل شويه و تويتر و الفيس بوك و اتفرج لقطات على اليوتيوب ، حتى مذاكرتي على الكمبيوتر ( سلايدات ، كتب ، اكواد )

و من هنا جاء دور الاخ نواف .. جزاه الله كويس على الدعم النفسي و المادي اللي قدموا

و مع خراب كمبيوتري كنت مشغول جدا في الاختبارات ..

و جدول اختباراتي في الاسبوعين اللي فاتت

من السبت الى الربوع في الاسبوع الاول

و الاسبوع الثاني : سبت و احد و ربوع

هذي كانت اسباب انقطاعي عن عالم التدوين .. و عموما النت كلوا ما كنت ادخله بكثره ..

…

..

.

لمحه سريعه : اكثر ما غير عليا جوا في هذي الفتره الاسئله الغريبه اللي تجيني من خلال موقع الاسئله ..

ولا الاسئله اللي ادخل اشوفها في حسابات اصحابي .. اسئله ما ادري ايش تبغى ..!!

.

فتوكوا ع خير < والله يعين على مباراة مصر و الجزائر اليوم ..

عامكم مبارك ..
والله يحقق لكم فيه كل اللي تتمنوه يا رب
:‫)
.

و بما اني طالب وفي هذه الفتره امر بأختبارات نصفيه
لكن دايما انا اقولهم المشكلة مش في الاختبارات ..  المشكله في اللي راح يختبرك هذا الاختبار ..
لانوا في دكاتره ما يعرفوا يحطوا اسئله..

.
حديكم مثال :
على دكتور مفلسع اخذ هذا الترم معاه مادة علوم القرآن
الدكتور مكاوي زاحف و محاضرتوا ممتعه خاصة لما يشطح و يتكلم في اشياء بعيده عن المنهج
في يوم تعيس جانا الدكتور و قال ترى اختباركم المحاضره الجايه …
و حدد لنا ما يقارب ٩٠ صفحه بس في الدوري الاول ..

.
المهم ذاكرت للأختبار و كل شئ كان تمام التمام ..
جا يوم الاختبار و وزع الدكتور الاوراق .. والاسئله بصراحه ما كانت سهله
واللي صدمني انوا في اسئله يقولي فيها اختار من التالي :
**   ذكر المؤلف المقوله الفلانيه في النقطه رقم (١ ،٢ ،٣ ،٤ )   **

.
طبعا الكتاب مليان نقاط ذكرها المؤلف .. المؤلف في كل موضوع حاط نقاط
وانا كطالب عادي ذاكرت النقاط و حفظتها لكن ما حفظت ارقامها ..

.
المهم حليت بطريقة (حقره بقره قلي عمي عد لعشره.. الخ )
،

طبعا ايش الدرس المستفاد من هذا الاختبار .. انوا في اختبارات لازم تبرشم النقاط اللي في الكتاب مع ارقامها عشان تحل و تجيب درجه كويسه ..

على العموم الله يعدي هذي الفتره على خييير .. و بالتوفيق للجميع