.

طبعا اغلبكم يعرف مطعم كودو .. و اغلبكم قيد اشترى من هذا المطعم ..

عني انا فمطعم كودو كنت ما ابدي عليه مطعم .. طبعا اذا جا في بالي اني اتعشى سندوشتات..

.

و بالفعل جا في بالي انا و الاخ العزيز نواف و معانا واحد كمان .. اننا في يوم نتعشى سندوشتات ..

و رحنا لكودو .. و انا و اقف عند المحاسب ..

طالع فيا نواف و قلي : شوف دحين راح تطلب وجبه من الحجم الصغير و راح يقولك ترى ما في الا الوسط و الكبير ..

طالعت فيه و قالتلوا .. ما عندي مشكله ايش فرقت ..

<< انا ما جا على بالي انوا هذا المطعم ناويلي على نصبه محترمه >>

.

المهم طلبت و دفعت و قعدت على الطاوله

و احنا قاعدين نتظر الطلب .. قعدت احسب بكم سعر الوجبه و اتأكد من الفاتوره ..

كان عددنا ثلاثه .. و الفاتوره تقول انوا حسابنا ٦٦ ريال .. و سعر الوجبه ١٧ ريال ..

<< مع الجوع دماغي كان حاطط لوحه ” راجعنا بعدين يا الحبيب ..” >>  

.

المفروض دام انوا سعر الوجبه ١٧ ريال و احنا ثلاثه يكون الحساب ٥١

و بما انوا مافي الحجم الصغير يعني زود على الحساب ٣ ريال حقت الحجم الوسط  راح يطلع المجموع = ٥٤

.

طيب من فين جات ٦٦ هذي ؟؟    

بعد استنتاجات خطيره اخطر من استنتاجات المحقق توغو  

<< شخصيه تحفه في فلم الكرتون اللي مو راضي يخلص كونان >>

اكتشفت انوا الكابتن اللي على الحساب لما جا يسجل طلباتنا ما سجلها كوجبات ..

لا .. المحاسب الخطير راح طلب لنا السندوشتات لحال و البطاطس و السفن لحال ..      

.

مع انوا الطلب اتأخر بس صدقوني لما اقولكم انوا اثبتت الدراسات الفسيولوكمياويه انوا الانسان لما يكون جيعان يفقد تركيزوا .. يعني ما وصلت لهذا الاستنتاج الا و الطلب جاهز ..

.

بس قبل ما اخذ الطلب رحت عند المحاسب بأتفاهم معاه على الفاتوره ..

بعد اخذ و عطا نطق المحاسب صاحب الجعصه الخطيره ..

قلي : هذا هو نظام الشركه ..

..

بس بس وصلنا .. يعني الشركه قالتلك انك تسجل الطلبات كذا .. !!

يعني هذا هو نظام كودو الجديد .. انصب على المشتري .. و استغل الزباين !!

ما لقيت عندو رد .. فمن وقتها حلفت انوا هذي اخر مره اشتري من كودو

و الحمدلله يا مكثر المطاعم في وطنا العزيز ..

……..

اخيرا

انا مني من النوع اللي يقاطع منتجات او شركات ،، ولا ادعم اي مقاطعه اياً كانت

لكن ما ارضى اني استغل بأي طريقه  .. عشان كذا راح اكسر القاعده ..

و من اليوم انا مقاطع لمطعم كودو ..  

…..

تحديث :

قيمة الساندوشت اللي قمت بطلبوا ١٢ ريال بدون وجبه ..

.

.

.

.

.

.

.

.

.

.

،

.

.

.

.

.

و بحسب نظام كودو الجديد دفعت ٢٢ ريال على الوجبه ..

يعني تقريبا  دفعت قيمة سندوشت ثاني  !!

* (( الصوره مأخوذه من موقع كودو ))

………….

اي احد لو تجربه مع مطعم كودو يكتب عنها .. وراح اضيفها عندي:

نواف ..    كودو النصااابين !

قروب في الفيس بوك ..

هذا المفتاح ما ادري شنو يبغى من الحياه !!!

يعني لو اكثر من سنتين و هو في نفس المكان ..

موقع المفتاح .. شجره عند مواقف السيارات في كلية الحاسب

السبب من تصويره و وضعه هنا :

لاني كل ما اشوفوا يجي في بالي سؤال .. معقول روبن هود ضيع مفتاح الكوخ ؟؟!!

** المصيبه انوا مضيع المفتاح و السبير ..

عامكم مبارك ..
والله يحقق لكم فيه كل اللي تتمنوه يا رب
:‫)
.

و بما اني طالب وفي هذه الفتره امر بأختبارات نصفيه
لكن دايما انا اقولهم المشكلة مش في الاختبارات ..  المشكله في اللي راح يختبرك هذا الاختبار ..
لانوا في دكاتره ما يعرفوا يحطوا اسئله..

.
حديكم مثال :
على دكتور مفلسع اخذ هذا الترم معاه مادة علوم القرآن
الدكتور مكاوي زاحف و محاضرتوا ممتعه خاصة لما يشطح و يتكلم في اشياء بعيده عن المنهج
في يوم تعيس جانا الدكتور و قال ترى اختباركم المحاضره الجايه …
و حدد لنا ما يقارب ٩٠ صفحه بس في الدوري الاول ..

.
المهم ذاكرت للأختبار و كل شئ كان تمام التمام ..
جا يوم الاختبار و وزع الدكتور الاوراق .. والاسئله بصراحه ما كانت سهله
واللي صدمني انوا في اسئله يقولي فيها اختار من التالي :
**   ذكر المؤلف المقوله الفلانيه في النقطه رقم (١ ،٢ ،٣ ،٤ )   **

.
طبعا الكتاب مليان نقاط ذكرها المؤلف .. المؤلف في كل موضوع حاط نقاط
وانا كطالب عادي ذاكرت النقاط و حفظتها لكن ما حفظت ارقامها ..

.
المهم حليت بطريقة (حقره بقره قلي عمي عد لعشره.. الخ )
،

طبعا ايش الدرس المستفاد من هذا الاختبار .. انوا في اختبارات لازم تبرشم النقاط اللي في الكتاب مع ارقامها عشان تحل و تجيب درجه كويسه ..

على العموم الله يعدي هذي الفتره على خييير .. و بالتوفيق للجميع

.

لكل عائلة كلمات تستخدمها بكثره … قد تكون هذه الكلمات غير مألوفه للبعض لانهم لم يسمعوها من قبل
لكنها مسليه لي شخصيا .. بحيث اكتشف مع كل لقاء مصطلحات جديده لم تكن في قاموسي الصغير مسبقا ..
بدأت هذه الاكتشافات بعد ان سمعت اهل والدتي (( رحمة الله عليها )) و هم من المدينه يستخدمون كلمات لم اكن اعرفها
لعل اكثر ما اثار ضحكي .. عندما سمعتهم يطلقون على “السلطة الحاره ” كلمة غريبه لم اكن اعرفها مسبقا..

و ايضا الاحظ كثيرا ان اهلي “آل حريري”  لديهم الكثير من الكلمات التي نادرا ما تجد غيرهم يستخدمها ..
و انا متأكد ان كل عائلة لديها بعض الكلمات التي تتداول بينها و تكون غريبه على غيرهم
….

طيب الموضوع للتسليه  فقط لا غير
وانا كثرت الكتابة باللغة العربيه الفصحى … بأرجع للعاميه

راح اقولكم بعض الكلمات اللي نستخدمها نحنا “ال حريري ” و معانيها .. اذا ما كنتوا عارفينها  :
“بعض الكلمات لازم تركز في التنوين عشان تنطقها صح “

١/ سَكلِفْ : يعني صرف او بالعاميه حقت اهل مكه زحلق
٢ / فسفسه : وهذه الكلمة تطلق على نقل الكلام .. او الهرجه اللي مالها نهاية .. يعني اشبه بهرج الحريم
٣/ دُقُس: هذه الكلمة مدينيه .. وتعني “السلطة الحاره”
٤ / خَرشه : يعني كذبه ..
٥ / لا تتحشد : جدتي دايما تقول هذي الكلمة يعني لا تخجل ..

:::

طبعا في كلمات ثانيه اصحابي دايما يقولوها ..
٥ / يا دغُش و يا طُرٌبش : على ذمة قائلها انها وصف للشخص الغبي …
٦ / افتش: نفس الحروف بس التاء مفتوحه  “تقال للشخص الغبي” .. ولكن اذا كسرت التاء تعني باليماني “اكشف”

وممكن حتى انتوا تكون عندكم كلمات ما احد يعرفها .. فاللي حابب يدلوا بدلوه فليتفضل مشكورا
^،^

اللي ما يسمعوا اغاني لا يدخلوا يكملوا الموضوع …
قارأ المزيد »

هذي المجموعه نضمت مجموعه من الدورات تحت مسمى ادارة المواقع الالكترونيه .. او ما سمته بـ (( شباب سايت ))
حأكون جدا صريح في هذا الكلام اللي راح اكتبه لاني ندمت من جد يوم جاملتهم لما سألني المسئول عنهم : ايش استفدت من الدوره .. وجاوبته بأنوا الدوره اضافة شئ للمعلومات اللي عندي .. في الحقيقه كانت بالنسبه لي عباره عن تضيعة وقت يوميه .. هذه التضيعه استمرت لإسبوعين و نصف متواصله ..
قارأ المزيد »

من سنتين لثلاثه سنوات وفي اجازه صيفيه .. اهلي كانوا في المدينه .. وما كان في البيت غيري انا و نواف
صحيت بعد سبات دام لفتره طويله ..ما ادري كم نمت بس الى الان افتكر اني صحيت في المغرب
رحت لغرفة نواف لقيتوا صاحي .. اخذت مفتاح سيارتوا على اساس اني جيعان و ما اكلت شئ من زمان ..
رحت اشتريت لي شئ اكلوا ورجعت البيت .. << البيت عندنا دورين>> .. فدخلت البيت و جيت طالع الدور الثاني..
وقبل ما اخلص الدرج للدور الثاني .. سمعت صوت كأنوا في واحد قاعد يفتش في البيت …
هنا انا انشطبت و بأسرع ما اداني ربي نزلت لغرفة نواف

طبعا مني متأكد ايش قتلوا هذاك الوقت بس ما اذكر اني استخدمت جمل مفيده ..
اخذت معايا خشبه كانت عند باب غرفتي و للأسف نواف اخذ معاه عقال !!
<< وقتها ما ركزت ايش معاه بس كان همي اننا نطلع سوا .. والموت مع الجماعه رحمه >>

وقفنا انا ونواف عند الدرج وسوينا بالتمام زي حركات طاش ما طاش .. قعدنا ننادي على الحرامي ههههه
وما بغينا نطلع كل واحد مننا يدف الثاني .. المهم واحد مننا اتجرأ و دخل و ما لقينا شئ ..
طبعا قيدوا الحرامي شرد من يوم ما سمع اصواتنا
فتشنا البيت لقينا في باب جانبي مفتوح قفلناه و انتهى موضوع الحرامي …

بس بعد ما هدي الوضع شويه .. طالعت في نواف ايش ماسك و من يوم شفت العقال مت من الضحك..
على قول واحد من اصحابنا .. نواف راح يقول للحرامي افتح يدك و يشحطوا بالعقال في يدوا
بعدها نواف يقول للحرامي : لا عاد تعيدهاااا ثاني فاااهم …
يعني يا نواف معقوله راح تساعدني اننا نفرش الحرامي وانتا ماسك عقال !!! ههههههههه
بس تدري يا نواف كويس انك كنت ماسك عقال لاني كنت راح اتجنن لو كنت ماسك شماغ ههههههه
بيني و بينكم انا طلعت العقال بس ما كنت متوقع انه راح ياخذوا ..

طبعا الموضوع كلوا تريقه على نواف فخذوا راحتكم على الاخر مرره ..

عند اطفش اوقاتي اللي اقضيها بالتسكع يكون تعبئة الزمزم من عند الحرم هيا الاطفش
تعود لعدة اسباب .. اولها و اخرها انوا الوضع عند اماكن التعبئه همجي جدا .. مما يدفعك بعض الاحيان انك ممكن تجرب قد ايش مداك ترفع صوتك على اللي يسقط عليك ولا اللي يستغفلك

طيب ليه عند الحرم بالذات لانوا كانت اول تعبية الزمزم جدا سهله .. ممكن اهل مكه عارفين انهم قفلوا اغلب مناطق التعبية
و هذا الشئ يخليك ترجع لنقطة الاصل اللي هيا انك تروح تعبي زمزم من عند الحرم

قارأ المزيد »

الاسبوع هذا كان مليان بالحداث و المواقف
ابدأها من فييين ؟!! طيب بما انهم مسوين لها حملة و مكلفين نفسهم عليها خلينا نتكلم عنهم شوي..
قارأ المزيد »

كما هو معروف عن مادة الثقافه الاسلاميه المستوى الثالث انها متعلقه بمواضيع الزواج
ولهذا اطلق على الماده اسم (( زواج ٣٠١ ))
طبعا هي خفيفه و سهله بس المشكله لما توقع في دكتور ما يعرف يتكلم
دكتورنا جزاه الله خير من يوم ما بدأ يشرح في هذي الماده وهوا مو داري ايش الخلطه !!
بس بعد ما اتكلم في موضوعين و كانت حجته فيها سيئه بعدها غسلت يدي منه تماما

اول موضوع :
كان قاعد يتكلم عن حلول للمشاكل بين الزوجين ….
و اذا بالدكتور الخطير اقترح حل خطير جدا هوا
اذا صارت الحياة بينك و بين زوجتك صعبه لا تطلقها
بدل ما تطلقها و تخرب بيتك….. اتزوج عليها
وبكذا انتا قللت من نسبة الطلاقات و المطلقات ..
(( عجييييب لا اقنعني .. ))

اما الموضوع الثاني:
كان تكلم عن تعدد الزوجات و انه له فوائد عديده << هذا شئ ما فيه خلاف
ومن الاشياء اللي يرى دكتورنا العزيز انها من الفوائد
هي انوا لو دب الملل في الحياة الزوجيه و بدأت تكثر حالات الطفش في البيت
تزوج وحده ثانيه يصير تونسك و الحريم يتونسوا سوا << عجيييييييييييب هههههههه
و اردف قائلا وكل ما اتزوجت اكثر كل ما ريحت راسك من كثره السؤال فين راح ومن فين جي !! << الدكتور راعي سهرات و خرجات و لفلفه .. ميه ميه …
و قال يا شباب حتى يصير ما تحتاجوا شغالات في بيوتكم حريمكم يوفوا و يكفوا ..
عندها قلت آن لي ان اطلع الجوال و اختم الالعاب اللي فيه

بس من جد معقوله هو يفكر بهذي الطريقه ؟؟
هل مفهوم الحياة الزوجيه عنده تتجه الى هذا الاتجاه ؟ من الواضح ان التعدد هوا حله الوحيد ..
معقوله نظرته انه لازم يعدد عشان حريمه يشتغلوا في البيت وما يحتاج الى خدم ؟؟؟
والله مشكلة لو اقتنع احد بكلامه ..