.

الحمدلله حمدا يليق بجلاله و عظيم سلطانه

..

ليلة السابع و العشرين (( يوم السادس و العشرين ))

يوم مميز باالنسبه لي ..

لانوا في هذا اليوم ابدأ احط اهدافي للسنه الجديده

عشان ما ابالغ مش كل الاهداف احققها

اللي يحصل انوا اكسل بعض الاحيان

وبعض الاحيان اكتشف انوا الهدف اللي حطيتوا لسنتي ما يناسبني

.

.

شنوا اهدافك في السنه اللي راحت ؟

كان عندي هدفين اساسين

الاول : اتوسع في مجال البرمجه

والحمدلله هذا الهدف مشيت فيه تمام

يعني اليوم انا ما اعتبر نفسي سيئ في لغة الجافا

و بدأت في البي اتش بي .. و ماشي فيها الحمدلله

و اتعلمت شئ خطير .. و يعتبر فلسفه مهمه في البرمجه:

مو لازم تكون تعرف دوال كثيره

المهم انك تعرف الدوال المهمه

و تعرف كيف تستخدمها اذا احتجتها

وكل ما كان كودك بسيط راح تتسهلك مسألة التعديل عليه

.

.

الثاني : اني ازبط جسمي

طبعا في شئ لازم تعرفوه .. انا مني دب

لكن مني نحيف

يعني وزني ع طولي .. كويس

لكن الهرجه و راء هذا الهدف .. انوا مشيت مع ناس في الجامعه ما شاء الله

مهتمين بنفسهم و اجسامهم خطيره ..

بصراحه احس نفسي بينهم انوا جسمي مهرهر (( مهرهر = مبهدل ، سيئ ))

فقلت خليني ابدأ اتمرن و امكن جسمي يزبط

لكن اللي اكتشفتوا انوا الشغله اصعب مما تخيلت

الشغله فيها تعب و يبغالها واحد فااااضي

* فهذا الهدف شطبتوا من اللسته الحاليه

.

.

.

……………………..   ~~~~~   مدونتي    ~~~~~    ……………….

.

.

و اليوم هذا مميز كمان

لاني قبل ٣ سنوات من اليوم فتحت هذي المدونه

يعني المدونه اكملت عامها الثالث ..

و من خلال تجربتي البسيطه .. اكتشفت اني مدون متواضع جدا و قد اكون سيئ

في السنه الاخيره مواضيعي لم تتجاوز ٢٥ موضوع

مسألة الكتابه و مراجعة المواضيع قبل النشر

مرهقه لي ..

فأنا افكر جديا بتحويل نشاط هذه المدونه

قد تكون الوجهه الجديده وجهه للحديث عن التقنيه و الاكواد البرمجيه و شروحات بسيطه

او تكون متابعة لحسابي في تويتر و يوتيوب

او مجرد فيديوهات (( بودكاست ))

يعني فيه شغلات كثيره في بالي بس الى الان ما رسيت على شئ

لكن مسألة كتابة اليوميات .. و الخواطر

اعتقد انها توفت عندي

.

.

بصراحه ما عندي فكره فين راح تكون الوجهه الجديده .. ولكن اشكر جميع من تابعني

و اشكركم على تواصلكم

والله يختار اللي فيه الخيير

…

طلب بسيط :

اللي عندوا اي ملاحظات علي او نصيحة وحابب انوا هو يقولي هو بدون ما يكشف عن شخصيتوا و بكل سريه

يدخل على هذا الموقع :

Majedoh

و اي فتوى تصدر من غيرهم قد تعرض صاحب الفتوى للعقوبه

..

يعني بالعربي الاسلام بالنظره مشايخنا

لا يسمح للمرأه بدخول النت بدون محرم لخبث طبيعتها

.

ولا يجوز ارتداء الكابات لانها من ناحية طبيه تسبب اضرار للعينين

ولا تجوز الجوالات الكاميرا

.

و لا تجوز القنوات الفضائيه التي تدعوا الى الفكر الخبيث (( مثل قناة الرساله )) ..١

و يستحب اعادة بناء ساحة الحرم .. لمنع الاختلاط

و نقلب الحرم ادوار .. << يا اخوان المسألة بسيطه

.

يحل للشيخ ان يصرح بأن ما حدث في جده عذاب للعباد

لكن اهل الرياض بينهم عمر و ابى بكر و الحسن و الحسين فلا يمكن ان يحدث عندهم الا تكفير للسيئات و ابتلاء من الله اللصابرين من عباده المتقين

،

و يجوز للشيخ ان يفتش جوالك بحجة البحث عن المقاطع الاباحية

و يجوز للشيخ ان يطاردك في حالة وجود شبهه دينه

(( ولا تجسسوا ))

(( يا أيها الذين آمنوا اجتنبوا كثيراً من الظن إن بعض الظن إثم ))

..

حدثنا يحيى بن يحيى قال قرأت على مالك عن أبي الزناد عن الأعرج عن أبي هريرة أن رسول الله صلى الله عليه وسلم قال إياكم والظن فإن الظن أكذب الحديث ولا تحسسوا ولا تجسسوا ولا تنافسوا ولا تحاسدوا ولا تباغضوا ولا تدابروا وكونوا عباد الله إخوانا

..

تخيلوا معي لو طلع هذا القرار ايام ما كان يعيش الشيوخ اصحاب المذاهب الاربعه

تخيلوا لو حرمت على احمد و مالك و ابن حنيفة و الشافعي

و وكلت الى علماء اخرين !!

..

مره سمعت لأحد تلاميذ ابن عثيمين يقول

لا تقولوا ان الشيخ تراجع في فتوى من فتواه .. الشيخ لن لم يغير كلامه اطلاقا

..

لكن في الجهه الاخرى نستمع الى قول الامام الشافعي

“‏إذا خالف كلامي كلام رسول الله فخذوا بكلام رسول الله واضربوا بكلامي عرض الحائط‏”‏ ‏(‏الإيقاظ ص‏:‏104‏)

..

المؤسف علمائنا  .. اذا خالفتهم في قضية خلافيه اصبحت الفاسق الذي لا تجوز الصلاه خلفه

او اصبحت باغي الشر و المكان الأصلح لك هو حلقة الخضار

.

و إن كنت انت منهم لكن غيرت فتواك في قضية خلافيه يطالبون بالحجر عليك

و تقام ندوات و محاضرات و جلسات لكي تنبه العامه منك

و عندما تناقشهم بالدليل و البرهان

يتغير عندهم مفهوم الحوار من الدليل و البرهان الى التمسك و التزمت و الاجبار

كما حدث مع الالباني في مسألة كشف الوجهه و رده على التويجري

رد الالباني على تشدد التويجري في كتابه الرد المفحم على من خالف العلماء وتشدد وتعصب وألزم المرأة أن تستر وجهها

http://ia311227.us.archive.org/1/items/Rad-MoF7ime/Rad-MoF7ime_text.pdf

..

في ختام الموضوع .. انا شخص من العامه لست مفتي ولا عالم ..

يا متشددون في فتواكم و قد اصبحت الفتوى الان عندكم ..

حتى و بعد ان صدر قرار يجعلكم المفتين الوحيدين في الممكلة ..

ترانا نعيش في عصر الانفتاح ..

والله يطيل بعمر القرضاوي

رمضان السنه هذي مميز

مميز لانوا السعوديه و ليبيا قرروا انهم يصوموا في نفس اليوم !

مميز لانوا حسب ما قرأت في تويتر   .. ٤٤  دوله بدأو  الصيام في نفس اليوم

.

والله يجعله مميز بالنسبه لنا

مميز بفعل الخيرات

مميز بالتخلص من العادات السيئه

مميز بختم القرآن ..

.

اللهم تقبل منا صيامنا و قيامنا و صالح اعمالنا انك على كل شئ قدير

،

كل رمضان و انتم بخييير

كل رمضان وانتم الى الله أقرب

المقصر : ماجد حريري

.

.

فكرة المنتديات كويسه للنسخ و اللصق و المواضيع المكرره
و اعتقد انوا رسميا فكرة المنتديات ماتت ..او بالاصح خمجت و عفنت و عاف عليها الدهر
……..
و اتصور انوا الفكرة الجديدة (( اللي اتوقع نجاحها )) لم تطبق الى الان
هيا انشاء مكان للنقاش و إبدأ الاراء بحريه تامه
يعني مكان ما يكون عليه مدير محتوى
ما في احد يحذف ردك او موضوعك عشان انتا كنت صريح و هرجت في شئ هو ما يبغاه
يحق لكل شخص انوا يكتب اللي يبغاه .. و يعطي وجهة نظروا في اي شئ
سواء كان هذا الشئ موقف عام او خدمة او جامعة او كلية او دكتور او.. الخ. …
ألكل قابل للنقد بطريقة حضاريه محترمه
…….
طيب كيف تقنن المشاركات .. يعني قد يتجاوز النقد الى رأي فيه شتم و استخفاف بالآخرين ؟
الحل :
اي شخص يرى ان هذه المشاركة سيئه يقوم بالتصويت بحجبها
واذا اجتمع اكثر من نصف المشتركين ع ان هذه المشاركة سيئه يقوم الموقع بحذفها
….
بكذا محد راح يحتاج مدير محتوى يراقب الموقع .. و يحذف اراء البشر عشان ما يزعل فلان و علان
لا يا حبيبي .. كل شخص حر في اللي يكتبوا
الموقع يكون ساحه حره .. ليست مخصصه لأحد
وليست ملكا لأحد ..

…

للحفاظ على حقوق الفكر .. الفكره مهي حقتي .. لكنها عجبتني جدا..بعد ما قلي هيا ” عمر العمري “

.

الاولى :

كن مداقشاً :

* “تعريف كلمة مداقش  .. تجي بمعنى مكافح “

.

يعني لا تيأس .. ولا تكون سلبي

وحط تحت لا تكون سلبي مليووون خط احمر ..

السلبي انسان دايما يسأل السؤال هذا ..

يعني لو سويت كذا ايش راح يصير ؟؟!!

.

هذا السؤال في قمة الاحباط و الاستسلام للأمر الواقع

و بصراحه ما افضل اتعامل مع الاشخاص السلبين ..

لانوا بعد فتره بدون ما اشعر الاقي نفسي صرت زيهم

.

كونك انسان سلبي ..يعني انك مسلم لكل ما يحدث لك ..

تلوم الحظ و المجتمع و الوقت و حتى السواق اللي عندكم في البيت ..

..

في الحقيقة انوا بعض الاشياء و المواقف يحتاج لها محاولات و محاولات جاده عشان تقدر توصل اللي انت تبغاه

ممكن تقرر تكون سلبي في لحظة و انت ما تدري انوا بقي لك شئ بسيط و كنت راح تأخذ اللي انت جيت عشانه ..

ترى السلبيه مراحل .. في عالم اعرفها وصلت بيها السلبيه انوا ما يجرب شئ ..

لانوا احتمال انوا ما يحصل اللي هو يبغاه  .. فهو يريح راسوا من البداية

” تذكر لا يوجد انسان ناجح توجد لدية خصلت السلبيه “

.

الثانية :

لا تربط حياتك الا بخالقك :

الارتباط معناه عميق و كبير جدا ..  ” واظنوا اكبر مني “

لكن انا حأخذ جزيئ  “  تصغير جزء ” من الارتباط

عادة ما يقيد الانسان و يمنعه من فعل اشياء كثيره هو ارتباطه بأشياء اخرى يخاف زوالها

بعد تجربة اطلب منك انك لا ترتبط بأي شئ سوا خالقك سبحانه وتعالى..

ارتباطك بشئ يقيد حركاتك و تصرفاتك

.

هذا مثال من حياتي الدراسيه :

بعض الطلاب اللي اشوفهم في الجامعه الاحظ عليهم انهم مرتبطين بمعدلاتهم بشكل كبير

و خايفين انوا المعدل يطيح .. فهذا الخوف اثر على تصرفاتهم

فمثلا لو طاح معدلهم .. تلاقيه زعلان و يتخبط يمين و يسار و من غرفة دكتور للثاني و يشوف لوا احد يكلم الدكتور الفلاني .. اهم شئ معدلوا لا يطيح

هذولا انا اشوفهم من وجهة نظري فقدوا شئ كبير من متعة الدراسه ..

كونك تجي الجامعه بدون ضغوط نفسيه و تجي عليك الاختبارات بدون ما يجيك ارق و قلق ..

انت كذا حصلت ع متعة الدراسه ..

المعنى من هذا الكلام .. انوا انت تجتهد و تذاكر و تسوي اللي عليك و تدعي ربك انوا يوفقك

و ارضى بالشئ اللي الله كتبوا لك ..

رضاك راح يعطيك راحه لا يمكن ان يشعر بها الا من خلا من اي ارتباط ..

…….

هذي الجاحتين جربتهم

وراح تساعدك انك تكون انسان يحصل على ما يريد و في نفس الوقت راضي و مرتاح البال بما حصل له..

^.^

.

طبعا اغلبكم يعرف مطعم كودو .. و اغلبكم قيد اشترى من هذا المطعم ..

عني انا فمطعم كودو كنت ما ابدي عليه مطعم .. طبعا اذا جا في بالي اني اتعشى سندوشتات..

.

و بالفعل جا في بالي انا و الاخ العزيز نواف و معانا واحد كمان .. اننا في يوم نتعشى سندوشتات ..

و رحنا لكودو .. و انا و اقف عند المحاسب ..

طالع فيا نواف و قلي : شوف دحين راح تطلب وجبه من الحجم الصغير و راح يقولك ترى ما في الا الوسط و الكبير ..

طالعت فيه و قالتلوا .. ما عندي مشكله ايش فرقت ..

<< انا ما جا على بالي انوا هذا المطعم ناويلي على نصبه محترمه >>

.

المهم طلبت و دفعت و قعدت على الطاوله

و احنا قاعدين نتظر الطلب .. قعدت احسب بكم سعر الوجبه و اتأكد من الفاتوره ..

كان عددنا ثلاثه .. و الفاتوره تقول انوا حسابنا ٦٦ ريال .. و سعر الوجبه ١٧ ريال ..

<< مع الجوع دماغي كان حاطط لوحه ” راجعنا بعدين يا الحبيب ..” >>  

.

المفروض دام انوا سعر الوجبه ١٧ ريال و احنا ثلاثه يكون الحساب ٥١

و بما انوا مافي الحجم الصغير يعني زود على الحساب ٣ ريال حقت الحجم الوسط  راح يطلع المجموع = ٥٤

.

طيب من فين جات ٦٦ هذي ؟؟    

بعد استنتاجات خطيره اخطر من استنتاجات المحقق توغو  

<< شخصيه تحفه في فلم الكرتون اللي مو راضي يخلص كونان >>

اكتشفت انوا الكابتن اللي على الحساب لما جا يسجل طلباتنا ما سجلها كوجبات ..

لا .. المحاسب الخطير راح طلب لنا السندوشتات لحال و البطاطس و السفن لحال ..      

.

مع انوا الطلب اتأخر بس صدقوني لما اقولكم انوا اثبتت الدراسات الفسيولوكمياويه انوا الانسان لما يكون جيعان يفقد تركيزوا .. يعني ما وصلت لهذا الاستنتاج الا و الطلب جاهز ..

.

بس قبل ما اخذ الطلب رحت عند المحاسب بأتفاهم معاه على الفاتوره ..

بعد اخذ و عطا نطق المحاسب صاحب الجعصه الخطيره ..

قلي : هذا هو نظام الشركه ..

..

بس بس وصلنا .. يعني الشركه قالتلك انك تسجل الطلبات كذا .. !!

يعني هذا هو نظام كودو الجديد .. انصب على المشتري .. و استغل الزباين !!

ما لقيت عندو رد .. فمن وقتها حلفت انوا هذي اخر مره اشتري من كودو

و الحمدلله يا مكثر المطاعم في وطنا العزيز ..

……..

اخيرا

انا مني من النوع اللي يقاطع منتجات او شركات ،، ولا ادعم اي مقاطعه اياً كانت

لكن ما ارضى اني استغل بأي طريقه  .. عشان كذا راح اكسر القاعده ..

و من اليوم انا مقاطع لمطعم كودو ..  

…..

تحديث :

قيمة الساندوشت اللي قمت بطلبوا ١٢ ريال بدون وجبه ..

.

.

.

.

.

.

.

.

.

.

،

.

.

.

.

.

و بحسب نظام كودو الجديد دفعت ٢٢ ريال على الوجبه ..

يعني تقريبا  دفعت قيمة سندوشت ثاني  !!

* (( الصوره مأخوذه من موقع كودو ))

………….

اي احد لو تجربه مع مطعم كودو يكتب عنها .. وراح اضيفها عندي:

نواف ..    كودو النصااابين !

قروب في الفيس بوك ..

حجم الملف بعد الضغط : ٣٢ ميقا ..

يحتوي على جمييع البرامج اللي كتبتها … او البرامج اللي اخذتها من الدكتور ..او حتى اكواد نسختها من كتاب

راح تفيدكم ان شاء الله .. << طبعا ما اؤيد انك تأخذ الكود زي ماهو .. حاول تفهموا و تعدل عليه ..

واللي عندوا اي استفسار عن الاكواد اللي مكتوبه

يراسلني على ايميلي … وراح اساعده ان شاء الله << لو كنت فاضي ^.^

DownLoad

ادخل ع الرابط و راح يتحمل تلقائيا ..

واذا ما اتحمل .. اضغط على Download بالزر اليمين

و بعدين Sava as ..

OR Download Linked File

والحمدلله انوا انتهى هذا الترم على خيير .. بقي الدرجات و ان شاء الله تكون تمام

…

اما موضوع التدوينه هذي .. عن عباره لطيفه ترددت كثيرا هذا الترم بالذات

.

ليه هذا الترم ؟!

.

لانوا الترم هذا كانت عندنا ماده برمجه و في نهاية الماده لازم تسلم مشروع

ويا ريتها المسأله بس ع المشروع و تسليموا .. لا دكاترتنا الاعزاء راح يناقشوا المشروع اللي انتا عملتوا .. و راح يكون ع مشروعك ٢٥ درجه ..

و عشان تأخذ درجه ممتازه “” لازم تركز يا ابني على الكووووود اللي بتكتبوا “”

* الكووووود : بضم الواو عشان تنطقها زي ما ينقطها حبايبنا ..

.

طيب و بدأت الشغل في البرنامج .. و ما احكيكم عن الليالي الظلماء اللي قعدت اشتغل فيها ع البرنامج ..

(( مره يطلع لي خطأ و يأخذ مني ساعه بس عشان الاقيه .. و مره مشكله في البرنامج .. و هيا شيل معاك باليوم او اليومين لين ما تزبط المصيبه اللي حصلت ))

….

و استمريت ع هذي الحال ٣ اسابيع و ليين ما انتهيت من البرنامج ..

** The Program was about FTP (server& Client ).1

وجاء موعد تسليم البرنامج و مناقشتوا .. طبعا كنا مجموعه مكونه من ٥ طلاب ..

…..

سلمنا المشروع و بدأت المناقشه .. طلب مننا الدكتور اننا نشغل البرنامج .. شغلنا و سوينا اللي هو يبغاه .. قالنا اوكي .. و كان هذا اخر شئ يرتبط بالكود و البرنامج ..

و بدأت الاسئله اللي مال امها صلاح بالكود و البرنامج ..

و شويه الدكتور يقول : كلكم كذابين .. اللي سوا الكود ماجد بس .. (( طبعا ما ادري كيف عرف هو شم ع قفا يدوا ولا ايش اللي حصل ))

قام الدكتور سألني سؤال بطريقة استحقار اليمه .. * هنا اخلاقي قفلت * .. قمت قلتلوا ما ادري ..

راح سأل اللي جنبي .. رحت عباطه جاوبت ع سؤالوا ..

قام طالع فيا الدكتور و قالي : انتا ما كتبت الكود من فين جبتوا ؟؟

طبعا لما قالي كذا … اتذكرت الثلاثة الاسابيع اللي قعدت اكتب فيها الكود و التعب اللي مريت فيه ..

و حسيت انوا شياطين الجن بدأت تنطنط في راسي

قلتلوا .. شوف الكود عندك .. (( طبعا هو ما طالع في الكود نهائيا )) .. قام صرف الهرجه .. و قالنا انوا مستوانا سيئ .. و ما نتوقع درجات كويسه

….

بعد ما خلصت المناقشه و خرجنا من عندوا .. جاء في بالي .. دحين ايش الفرق بيني و بين العيال اللي مسوين الكود عند المصري ؟؟

لكنا اتعاملنا بنفس الطريقه كلنا راح يخسف بينا .. و اولا و اخيرا هو ما طالع في الكود اللي مكتووب ..

….

بس زادت قناعتي انوا احنا مجتمع متخلف علميا .. حتى في الاماكن اللي المفروض يكون فيها نسبة التخلف اقل تظهر لك عينات زي الدكتور الحبيب هذا .. اللي ما ادري ليش حاطينوا عندنا في الكليه ..

….

على العموم في ختام موضوعي الدرامي .. احب اقول اللي معانا في كلية الحاسب .. او اي مبتدئ في الجافا ..

اني راح انزل كل برامج الجافا اللي انا سويتها و اللي اخذتها من غيري على مدونتي خلال فترة الصيف ان شاء الله

و الله يعين و يوفق الجميييع ان شاء الله .. . 

1- اذكر اسم من طلب منك حل هذا الواجب.

2- تحدث عن ستة أسرار قد لا يكتشفها من يقابلك للمرة الأولى.

3- حول هذا الواجب إلى ستة مدونين، واذكر أسماءهم مع روابط مدوناتهم في موضوعك.

4- اترك تعليقا في مدونة من حولت الواجب إليهم، ليعلموا عن هذا الواجب.

……………………………………….

1_ أرسلتلي الواجب  المدونه ”بيان “

٢- اما الاسرار السته للإنسان اللي اول مره يقابلني فيها امكن ما يكتشفها ..

طيب طيب

كثير المحشات و التريقه – مزاجي ( و مزاجي محترررف و متمرس ) – اعتقد اني طيوب – لو قعد في مكان مكتوم اخلاقي تنعدم ( وقد تصل الى الصفر )  – اكره الحر -  ما ارد على جوالي الا ف المناسبات السعيده

٣- اما ع تحويل الواجب .. فاللي يبغاني احولوا هوا يديني خبر.. لاني ما ابغى اشغل احد و هذي الفتره فتره اختبارات .. (( الله يوفق اللي لسى باقيلهم )

.

مين كان يتوقع قبل ١٠٠ سنه انوا الانسان مداه يرسل موجات غير مرئيه الى ابراج و الابراج ترسلها لابراج ثانيه .. هذا كلوا عشان يتصل بشخص …

.

كثيره هي الاشياء التي تستحق الوقوف عندها و التأمل ..

.

لكن ثق تماما .. خيال الانسان ممكن ان يصبح حقيقه بعون الله

وان المستحيل غير موجود في هذا الكون ..

*****

هذا مقطع لشباب يحاولوا يمشوا فوق المويه … (( طبعا ما ادري اذا المقطع ملفق ولا حقيقي ))

مقطع مجنووون

.
.
.